پنڈدادنخان ( ملک ظہیرا عوان)
پیر چک نزد پنڈی سید پور میں ریسکیو 1122 آفس کا افتتاح کر دیا گیا ۔ ریسکیو 1122 ٹاؤن اسٹیشن پیر چک تحصیل پنڈ دادنخان جہلم کا افتتاح ممبر قومی اسمبلی چوہدری فرخ الطاف نے کیا ۔تفصیلات کے مطابق وزیر اعلیٰ پنجاب مریم نواز شریف کے ویثرن کے مطابق اور سیکرٹری ایمرجنسی سروس ڈاکٹر رضوان نصیر کے احکامات پر تحصیل پنڈ دادنخان میں ریسکیو 1122 ٹاؤن اسٹیشن پیر چک نزد پنڈی سید پور کا باقاعدہ افتتاح کر دیا گیا افتتاح ایم این اے چوہدری فرخ الطاف نے کیا۔ ان کے ہمراہ ڈسٹرکٹ ایمرجنسی آفیسر جہلم انجینئر سعید احمد ، ریسکیو اینڈ سیفٹی آفیسر اعجاز احمد ، نصر اللہ خان ایس ڈی او بلڈنگ ڈیپارٹمنٹ اور معروف سماجی رفاعی شخصیت نذیر مارتھ سمیت علاقہ سے عوام کی بڑی تعداد نے شرکت کی ۔ اس موقع پر ڈسٹرکٹ ایمرجنسی آفیسر نے مہمان خصوصی کو ٹاؤن ریسکیو سٹیشن کے قیام کے اغراض و مقاصد کے بارے بتایا کہ اس اسٹیشن سے جلال پور، وادی چمکون، پنڈی سید پور، پننوال، سگھر پور، چک شادی، دھریالہ جالپ ، کھوتیاں جالپ اور گردونواح کی عوام کو بروقت ابتدائی طبی امداد فراہم کر کے ہسپتال منتقل کیا جا سکے گا ۔ اس موقع پر مہمان خصوصی چوہدری فرخ الطاف (MNA) نے تحصیل پنڈ دادنخان میں دوسرے ریسکیو اسٹیشن کے قیام اور دو نئی ایمبولینس مہیا کرنے پر وزیراعلی پنجاب مریم نواز صاحبہ کا شکریہ ادا کیا اور کہا کہ علاقے کے لوگوں کو بر وقت طبی امداد فراہم کی جائے گی ۔
0
