جہلم محکمہ سوئی گیس کی جانب سے سوئی گیس کے بلوں کی مد میں بڑے اضافے ا

جہلم(چوہدری عابد محمود +عمیراحمدراجہ)جہلم محکمہ سوئی گیس کی جانب سے سوئی گیس کے بلوں کی مد میں بڑے اضافے اور 5سو روپے میٹر کرایہ کو فکس ٹیکس کی شکل دیئے جانے کے بعد صارفین کو ہزاروں روپے کے بل موصول ہونے لگے، صارفین سراپا احتجاج، وزیراعظم پاکستان سے نوٹس لینے کا مطالبہ۔ تفصیلات کے مطابق شہر سمیت ملحقہ علاقوں کے صارفین نے اخبار نویسوں سے گفتگو کرتے ہوئے بتایا کہ سردیوں کے موسم میں جب ہیٹر جلتے تھے اس وقت گھریلو صارفین کو بمشکل 2 سے اڑھائی ہزار روپے کا بل موصول ہوتا تھااور اب گرمیوں کا موسم ہے، ہیٹر، گیزر اور سوئی گیس سے چلنے والی دیگر اشیاء بند ہو چکی ہیں گھروں کے اندر امور ِ خانہ داری کے لئے چولہے استعمال کئے جارہے ہیں حکومت نے عوام کو ریلیف دینے کی بجائے صارفین کی جیبوں کی صفائی شروع کررکھی ہے، رواں ماہ موصول ہونے والے بل ہزاروں میں بھجوا دیئے گئے ہیں جو کہ سوئی گیس کے صارفین کے ساتھ سخت زیادتی کے مترادف ہے۔ سوئی گیس صارفین نے بتایا کہ پہلی مرتبہ محکمہ سوئی گیس نے سوئی گیس کے میٹر کا کرایہ 5 سو روپے لاگو کیا ہے جو کہ صارفین کو خود کشیاں کرنے پر مجبور کرنے کے مترادف ہے۔ سوئی گیس صارفین نے وزیراعظم پاکستان،وفاقی وزیر پٹرولیم سے مطالبہ کیاہے کہ سوئی گیس کے بلوں میں اضافی ٹیکسز اور میٹر کے کرائے میں کمی کے احکامات جاری کئے جائیں تاکہ غریب سفید پوش طبقہ حکومتی سہولیات سے مستفید ہو سکے۔