جہلم میونسپل کمیٹی، ٹریفک پولیس کی سرپرستی میں جگہ جگہ غیر قانونی چنگ چی رکشہ اسٹینڈ قائم

جہلم(چوہدری عابد محمود +چوہدری مہربان حسین)جہلم میونسپل کمیٹی، ٹریفک پولیس کی سرپرستی میں جگہ جگہ غیر قانونی چنگ چی رکشہ اسٹینڈ قائم،شاندار چوک کے چاروں اطراف بااثر ڈرائیوروں نے سڑکوں پر رکشے کھڑے کر دئیے،شہریوں کو آمدورفت میں مشکلات کا سامنا، میونسپل کمیٹی اور ٹریفک پولیس نے شہریوں کے مسائل سے مکمل لا تعلقی اختیار کر لی، کم عمر چنگ چی رکشہ ڈرائیورز، بغیر روٹ پرمٹ اور بغیر لائسنس شناختی کارڈ کے خطرناک طریقے سے سڑکوں پر چنگ چی رکشے دوڑاتے نظر آتے ہیں جس کے باعث حادثات روزانہ کا معمول بن چکے ہیں، شہریوں نے ڈی پی او جہلم، ڈپٹی کمشنر سے نوٹس لینے کا مطالبہ کیاہے۔تفصیلات کے مطابق شاندار چوک سے ملحقہ، تحصیل روڈ، سول لائن روڈ، ریلوے روڈ، اولڈ جی ٹی روڈ، نیا بازار،اقبال لائبریری روڈ،جی ٹی ایس چوک،جادہ چوک سمیت دیگر درجنوں مقامات پر ہمہ وقت سڑکوں پر چنگ چی رکشے کھڑے کرکے ٹریفک بلاک کر دی جاتی ہے، دوسری جانب بازاروں میں خریداری کے لیے آنے والی خواتین کو بھی غیر قانونی رکشہ اسٹینڈ کیوجہ سے پریشانی کا سامنا کرنا پڑتاہے،رکشوں کے غیر قانونی اڈوں اور شور شرابے و دھوئیں سے شہری بہرے پن،دمے،ٹی بی کے مرض اور آنکھوں کی بیماریوں کا شکار ہورہے ہیں، شاندار چوک میں تعینات ٹریفک پولیس کے افسران و اہلکار بھی رکشہ ڈرائیوروں کی سرپرستی کرتے نظرآتے ہیں، جبکہ سیکرٹری ڈسٹرکٹ روڈ ٹرانسپورٹ اتھارٹی، موٹر وہیکل ایگزامینر بھی چنگ چی رکشہ ڈرائیوروں کے خلاف کارروائیاں کرنے سے گریزاں ہیں۔ قابل زکر بات یہ ہے کہ بیشتر رکشہ ڈرائیوروں کے پاس نہ تو لائسنس ہیں اور نہ ہی شناختی کارڈ، جبکہ بیشتر ڈرائیورز ضعیف العمر ہیں جو سواریوں کو رکشوں پر سوار کرکے سڑکوں پر موت کا کھیل جاری رکھے ہوئے ہیں۔ شہریوں نے انسپکٹر جنرل پنجاب پولیس، آر پی او راولپنڈی،ڈی پی او، ڈی ایس پی ٹریفک سے مطالبہ کیا ہے کہ شہر میں قائم ہونے والے غیر قانونی چنگ چی رکشہ اسٹینڈ کا خاتمہ کروایاجائے اور بغیر لائسنس، شناختی کارڈ کے بغیر چنگ چی رکشے چلانے والے ڈرائیورز کے کیخلاف کریک ڈاؤن کیا جائے تاکہ شہریوں کی مشکلات اور حادثات میں کمی واقع ہو سکے۔