بیرونی دشمن بلوچستان کی ترقی نہیں چاہتے: وزیر اعظم

گوادر میں ماہی گیروں میں چیک اور طلبا میں لیپ ٹاپ تقسیم کرنے کی تقریب سے خطاب کرتے ہوئے وزیر اعظم نے کہا کہ بلوچستان کو دیے جانے والے لیپ ٹاپ کے کوٹا میں 14 فیصد اضافہ کردیا ہے، اگلی بار ہم آئے تو یہ اضافہ 18 فیصد تک کردیں گے۔

شہباز شریف کا کہنا تھا کہ کوئی صوبہ اکیلے ترقی کرے تو پاکستان ترقی نہیں کرسکتا، سابق حکومت کو گوادر اور بلوچستان کی ترقی گوارانہیں تھی،5 سال میں ایک ایک لاکھ ٹن سامان محض منگوایاگیا جبکہ ہمارے دور میں15ماہ میں6لاکھ ٹن کاسامان گوادر سے آیا۔ اکنامک سائیکل کا فائدہ گوادر اور بلوچستان کےعوام کو ہوگا۔

انہوں نے کہا کہ چین نے کل2.4ارب ڈالر کا قرضہ رول اوور کیا، سعودی عرب، چین، متحدہ عرب امارات نے ہماری مدد کی، پاکستان ڈیفالٹ کےخطرےسےنکل چکا۔

وزیراعظم کا کہنا تھا کہ مجھے بتایا گیا کہ 2015 کے بعد گوادر بندرگاہ کی ڈرلنگ نہیں ہوئی، اگرصفائی نہیں ہوگی تو جہاز کیسے آئیں گے؟ ہم نے معاہدہ کرکےڈرلنگ شروع کی،فروری مارچ تک مکمل ہوجائے گی۔

انہوں نے مزید کہا کہ پانی کی گہرائیوں کےحوالےسےگوادر کا دنیا میں نام ہے، گوادر کا سمندر دنیا کے گہرے ترین سمندرمیں شمار ہوتاہے، بلوچستان کے ترقیاتی منصوبوں میں عوام کی ترقی کاراز پنہاں ہے۔

شہبازشریف کا کہنا تھا کہ سابق دور حکومت میں اربوں روپے جھونک دیئے گئے مگر عوام کو کوئی فائدہ نہ ہوا، ریکوڈک کے جھگڑے پر اربوں روپے لگ گئے، ریکوڈک، سینڈک ودیگر خزانے صوبے میں موجود ہیں، ذخائرپرسب سے پہلا حق یہاں کےعوام کا ہے۔