ریسکیو 1122 اسٹیشن پنڈدادنخان پر CERT ٹیموں کا مقابلہ

پنڈ دادنخان ( ملک ظہیر اعوان سے)ریسکیو 1122 اسٹیشن پنڈدادنخان پر CERT ٹیموں کا مقابلہ تمام ٹیموں نے بہت اچھی کارکردگی کا مظاہرہ کیا مقابلے میں کسی بھی بڑے حادثے میں ایک سے زیادہ زخمی ہونے والے افراد کو فوری طور پر درجہ بندی کرتے ہوئے فسٹ ایڈ دینا اور زیادہ زخمی افراد کو ہسپتال منتقل کرنا شامل تھا اس کے علاوہ کسی بھی بڑے حادثے میں عمارت میں پھنسے ہوئے افراد کو سرچ اینڈ ریسکیو ٹیکنیک کے ذریعے تلاش کرتے ہوئے باہر نکالنا، چھوٹی آگ پرDCP فائر سلنڈر کا استعمال کرتے ہوئے قابو پانا،اور بغیر DCP سلنڈر کے پانی کی مدد سے آگ بجھانا شامل تھا۔ علاوہ ازیں پانی میں پھنسے ہوئے شخص کو باحفاظت باہر نکالنا اور عمارتی ملبے کے نیچے دبے افراد کو باہر نکالنا شامل تھا۔ اس موقعہ پر ڈسٹرکٹ ایمرجنسی آفیسر جہلم انجینئر سعید احمد کا کہنا تھا، کسی بھی سانحے کی صورت میں دور دراز علاقوں میں جب ریسکیو ٹیمیں بروقت نہیں پہنچ پاتی تو سرٹ ٹیمیں اپنا کردار ادا کرتی ہیں مریضوں کی بروقت درجہ بندی کرتے ہوئے فسٹ ایڈ دیتی ہیں۔ انہوں نے مزید کہا کہ ریسکیو 1122 مزید ٹریننگ کے لئے لائحہ عمل تیار کر رہی ہے جس میں ہر علاقے میں ایک سرٹ ٹیم کی مکمل ٹریننگ دی جائے گی تا کہ وہ عوام کی مدد کے لئے ریسکیو 1122 کا بھر پور ساتھ دے سکیں۔