اسلام آباد(رپورٹر محمد ابراہیم عباسی )اسلام آباد ہائی کورٹ نے شالیمار ریکارڈنگ اینڈ براڈکاسٹنگ کارپوریشن (SRBC) کی مالی مشکلات اور ملازمین کی تنخواہوں کی عدم ادائیگی کے معاملے پر اہم پیشرفت کرتے ہوئے فریقین کو نوٹس جاری کر دیا اور جواب طلب کر لیا۔
جسٹس سردار اعجاز اسحاق خان نے کیس کی سماعت کی، جہاں درخواست گزار کی جانب سے بیرسٹر عمر ملک عدالت میں پیش ہوئے۔ درخواست میں مؤقف اختیار کیا گیا کہ کمپنی نے 2018 سے اب تک سالانہ یا غیر معمولی جنرل میٹنگز نہیں بلائیں، جو کمپنی ایکٹ 2017 کی خلاف ورزی ہے۔
مزید کہا گیا کہ پاکستان ٹیلی ویژن کارپوریشن لمیٹڈ (PTVC) نے اپنی مالی امداد واپس لے لی ہے، جس کے باعث کمپنی شدید مالی بحران کا شکار ہو گئی ہے اور نومبر 2024 تک ملازمین کی تنخواہوں کی بقایا رقم 37 کروڑ 57 لاکھ 50 ہزار روپے تک پہنچ چکی ہے۔
درخواست میں عدالت سے استدعا کی گئی کہ کمپنی کے اثاثے فروخت کرنے یا بینک اکاؤنٹس چلانے پر حکم امتناع جاری کیا جائے اور کمپنی کو بند کرنے کا حکم دیا جائے۔عدالت نے دلائل سننے کے بعد کیس کی مزید سماعت 16 اپریل تک ملتوی کر دی۔
مزید پڑھیں: ملک کے کئی علاقوں میں بارش اور برفباری کی پیشگوئی
The post ملازمین کو تنخواہیں نہ دینے پر شالیمار ریکارڈنگ اینڈ براڈکاسٹنگ کارپوریشن کی بندش کی درخواست پر نوٹس جاری appeared first on ABN News.
