میڈیا میں خبروں کے باوجود،واپڈا دینہ کی ناہلی اور غفلت جاری

دینہ(ادریس چودھری)میڈیا میں خبروں کے باوجود،واپڈا دینہ کی ناہلی اور غفلت جاری،تحصیل دینہ کے گاؤں مہسیاں (کوٹلی) میں بجلی کے پولوں کوزنگ لگ گیا،لوگوں کے گھروں پر گزرتی تاروں سے کسی بھی وقت بڑے سانحے کا خدشہ،اہل علاقہ کا شدید احتجاج۔تفصیلات کے مطابق دینہ کے نواحی گاؤں مہسیاں (کوٹلی) میں سالوں پرانے بجلی کے پول زنگ آلود ہو چکے ہیں۔ان میں کئی تو زنگ کی وجہ سے کسی بھی وقت زمین بوس ہو سکتے ہیں۔کئی گھروں کی چھتوں سے ان بجلی کے پولوں کی تاریں گزر رہی ہیں،جن کی وجہ سے کسی بھی وقت کوئی قیمتی جان ضائع ہو سکتی ہے۔ان حالات میں متعلقہ واپڈا دینہ نمبر 2کے اعلیٰ حکام نے کبوتر کی طرح آنکھیں بند کر رکھی ہیں۔میڈیا میں خبریں آنے کے باجود اس کے کانوں تک جوں تک نہیں رینگی۔اور کسی بڑے حادثے کا منتظر ہے۔اہل علاقہ اپنی جان ہتھیلی پر رکھ کر اپنے روز مرہ کے کام کاج جاری رکھنے پر مجبور ہیں۔ان عوامی حلقوں نے ڈپٹی کمشنر جہلم اور واپڈا کے اعلیٰ حکام سے پرزور مطالبہ کیا کہ وہ کسی بڑے سانحے کا انتظار نہ کریں اور فوری طور پر پچاس سال پہلے کے ان بجلی کے پولوں کو تبدیل اور گھروں کی چھتوں سے بجلی کی تاریں ہٹانے کے احکامات جاری کریں۔علاقے پر ان کا یہ”احسان عظیم“ ہو گا۔