دینہ شہر و گردونواح میں مچھروں کی تعداد میں غیر معمولی اضافہ

دینہ(ادریس چودھری) موسم کی تبدیلی کے ساتھ ہی دینہ شہر و گردونواح میں مچھروں کی تعداد میں غیر معمولی اضافہ، صفائی کے نظام میں لاپرواہی اور مچھر مار سپرے نہ ہونے کے وجہ سے شہریوں میں وبائی امراض سمیت ڈینگی کے مرض میں مبتلا ہونے کا خدشہ، عوامی و سماجی حلقوں کاڈپٹی کمشنر، ایڈمنسٹریٹر میونسپل کمیٹی سے مچھر مار سپرے کروانے کا مطالبہ۔تفصیلات کے مطابق دینہ شہرو گردونواح میں مچھروں کی افزائش نسل میں اضافہ ہوگیا، شہر کے مرکزی مقامات سمیت اندرونی علاقوں کے خالی پلاٹوں، میدانوں میں گندگی و غلاظت کے ڈھیر اور بارشوں کیوجہ سے کھڑا پانی مچھروں کی افزائش نسل کی نرسریاں بن چکی ہیں، شہر کے گلی محلوں میں صفائی کی ابتر صورتحال کے باعث مچھروں کی افزائش نسل میں اضافہ ہو رہا ہے۔شہریوں کا اس حوالے سے کہنا ہے کہ ڈینگی کی آگاہی کے لئے بڑے بڑے سیمینار، واک وغیرہ کا اہتمام کیا جاتا ہے کہ شہر سمیت مضافاتی علاقوں کی صورتحال سے ناآشنا انتظامیہ مچھروں کے خاتمے کے لئے صفائی ستھرائی اور سپرے وغیرہ کا اہتمام نہیں کر رہے، انہوں نے کہا کہ عرصہ دراز سے مچھر مار سپرنہیں کیا جا رہا جس کی وجہ سے ڈینگی مچھرسمیت دیگر حشرات الارض میں اضافہ ہو رہاہے جس کیوجہ سے شہریوں سمیت بچے، بوڑھے، عورتیں موذی امراض سمیت ڈینگی کے مرض میں مبتلا ہورہے ہیں۔اس صورتحال پر شہریوں نے ڈپٹی کمشنر جہلم، ایڈمنسٹریٹر میونسپل کمیٹی دینہ سے دینہ شہر سمیت مضافاتی علاقوں میں صفائی کا نظام بہتر بنانے اور مچھر ما ر سپرے کروانے کا مطالبہ کیا ہے۔