0

مسئلہ فلسطین کے حل کا واحد راستہ دو ریاستی حل ہے: پاکستان

ترجمان دفتر خارجہ ممتاز زہرا بلوچ
ترجمان دفتر خارجہ ممتاز زہرا بلوچ نے کہا ہے کہ پاکستان 1967 سے قبل کی سرحدوں پر فلسطینی ریاست کے قیام کے حامی ہیں، اور سمجھتے ہیں کہ فلسطین کا حل دو ریاستی حل پر مشتمل ہے۔

ترجمان دفتر خارجہ ممتاز زہرا بلوچ نے صحافیوں کو ہفتہ وار بریفنگ میں کہا کہ اقوام متحدہ کے سیکریٹری جنرل کے مطابق غزہ میں شہریوں کو شدید خطرات ہیں، غزہ میں کوئی بھی جگہ عوام کے لیے محفوظ نہیں ہے، پاکستان غزہ میں اسرائیل کے طاقت کے استعمال کی شدید مذمت کرتا ہے۔

انھوں نے بتایا کہ ایڈیشنل سیکریٹری خارجہ نے گھانا میں پیس کیپنگ اجلاس میں شرکت کی، کانفرنس میں پاکستان نے 19 وعدے کیے جو کہ امن کے عزم کا اظہار ہیں، گھانا میں شہریار اکبر نے صدر اور وزیر خارجہ سے ملاقاتیں کیں، ایڈیشنل سیکریٹری خارجہ پیس آپریشنز کے انڈر سیکریٹری سمیت دیگر حکام سے ملے۔

ترجمان نے کہا پاکستان اور میکسیکو میں باہمی سیاسی مشاورت کا چھٹا دور اسلام آباد میں ہوا، اس ہفتے امریکی وفود کے دوروں کی سیریز جاری ہے، یہ دورے پاک امریکا تعلقات کی بہتری کے حوالے سے ہیں، ان دوروں کا مقصد صرف افغانستان نہیں ہے۔

ممتاز زہرا بلوچ نے بریفنگ میں کہا پاکستان نے کبھی مقبوضہ کشمیر پر بھارتی قبضے کو تسلیم نہیں کیا، 5 اگست 2019 کے یک طرفہ اور غیر قانونی اقدامات کشمیر کے ڈھانچے کو تبدیل کرنے کی کوشش ہے، یہ اقدامات انسانی قوانین اور جینوا کنونشنز کی سرعام خلاف ورزی ہیں، پاکستان مسئلہ کشمیر کے پر امن حل تک کشمیری بہن بھائیوں کی حمایت جاری رکھے گا۔

اپنا تبصرہ بھیجیں