وفد میں وفاقی وزیر آنفارمیشن ٹیکنالوجی سید امین الحق، گورنر سندھ کامران خان ٹیسوری، ڈاکٹر فاروق ستار اور مصطفیٰ کمال شریک تھے۔ ملاقات میں وفاقی وزیر ریلوے و ہوا بازی خواجہ سعد رفیق اور وفاقی وزیر اقتصادی امور سردار ایاز صادق نے بھی شرکت کی۔
ایم کیو ایم پاکستان کے وفد کی ڈاکٹر خالد مقبول صدیقی کی سربراہی میں اہم مشاورت کیلئے وزیراعظم شہباز شریف کی دعوت پر اُن سے ملاقات۔
وفد میں گورنر سندھ کامران ٹیسوری، سید مصطفیٰ کمال، ڈاکٹر فاروق ستار اور سید امین الحق شامل۔ ملاقات میں وفاقی وزراء احسن اقبال، ایاز صادق اور سعد رفیق… pic.twitter.com/Ps6Z6vkRLh— Syed Mustafa Kamal (@KamalMQM) July 19, 2023
ذرائع کے مطابق وزیرِ اعظم نے نگراں حکومت سمیت تمام اہم فیصلوں میں ایم کیو ایم کو شامل کرنے کی ہدایت کر دی۔ ملاقات میں موجودہ ملکی سیاسی صورتحال پر تفصیلی مشاورت ہوئی اور حالیہ مردم شماری کے حوالے سے بھی بات چیت ہوئی۔
ملاقات وزیرِاعظم کی نگراں حکومت کی تشکیل کے لیے اتحادیوں سے مشاورت کے سلسلے کی ایک کڑی ہے۔ وفد نے وزیرِ اعظم کو کراچی میں وفاقی حکومت کے جاری منصوبوں کی ذاتی نگرانی اور ترجیحی بنیادوں پر ان پر کام یقینی بنانے پر خراج تحسین پیش کیا۔
متحدہ کے وفد نے وزیرِ اعظم کی قیادت میں حکومتی معاشی ٹیم کی کوششوں سے آئی ایم ایف کے ساتھ معاہدہ مکمل ہونے پر ان کو خراج تحسین پیش کیا۔
