سپریم کورٹ آف پاکستان لاہور ہائیکورٹ کو پاکستان تحریک انصاف (پی ٹی آئی) کے صدر اور سابق وزیر اعلیٰ پنجاب چوہدری پرویز الہٰی کی درخواستوں پر 21 اگست تک فیصلہ کرنے کا حکم دیدیا۔
سپریم کورٹ میں جسٹس اعجاز الاحسن کی سربراہی میں تین رکنی بینچ نے سابق وزیراعلیٰ پنجاب پرویز الٰہی کی درخواست ضمانت پر سماعت کی جس میں عدالت نے لاہور ہائیکورٹ کو 21 اگست کو پرویز الٰہی کی درخواستوں پر فیصلہ کرنے کا حکم دیا۔
یہ بھی پڑھیں: سانحہ نو مئی: پی ٹی آئی کے 22 اہم رہنما اشتہاری قرار
عدالت نے اپنے حکم میں کہا کہ ہائیکورٹ 21 اگست کو فیصلہ نہیں کرتی تو گرفتاری کا عبوری حکم نامہ معطل تصور ہوگا۔ بعد ازاں عدالت نے کیس کی سماعت غیر معینہ مدت کے لیے ملتوی کردی۔
واضح رہے کہ لاہور ہائیکورٹ نے عبوری حکم نامے میں پرویزالٰہی کی ضمانت مسترد کی تھی۔ گزشتہ روز لاہور کی احتساب عدالت نے سابق وزیر اعلیٰ پنجاب اور پاکستان تحریک انصاف کے صدر پرویز الٰہی کو 6 دن کے جسمانی ریمانڈ پر قومی احتساب بیورو (نیب) کے حوالے کیا۔
