اسلام آباد میں غیر ملکی میڈیا نمائندوں سے گفتگو کرتے ہوئے انوار الحق کاکڑ کا کہنا تھا کہ تمام شعبوں کیلئے بجٹ مختص کرنا پارلیمنٹ کا اختیار ہے، نگران حکومت کی بنیادی آئینی ذمہ داری انتخابات میں معاونت فراہم کرنا ہے، آئینی طور پر حکومتی نظام میں بڑی تبدیلی نہیں لاسکتے۔
انوار الحق کاکڑ نے کہا ہے کہ زراعت، کان کنی اور معدنیات جیسے شعبے اہم ترجیح ہیں، اپنے دائرہ کار میں رہتے ہوئے معاشی اور مالی معاملات چلارہے ہیں، ہم اپنے آئینی مینڈیٹ سے آگے نہیں بڑھ سکتے، خصوصی سرمایہ کاری سہولت کونسل کو آگے بڑھانا اہم ترجیح ہے۔
نگران وزیراعظم نے کہا ہے کہ ملک میں ڈھانچہ جاتی اصلاحات کی بہت ضرورت ہے، ایف بی آر اور توانائی کے شعبوں میں اصلاحات کی ضرورت ہے، ہم مختصر مدتی اصلاحات کرسکتے ہیں جن کے مستقبل کا فیصلہ منتخب حکومت کریگی، کچھ توانائی کی تقسیم کار کمپنیاں نجکاری فہرست میں شامل ہیں۔
انہوں نے کہا ہے کہ تمام رجسٹرڈ سیاسی جماعتوں کو انتخابی عمل میں حصہ لینے کی آزادی ہے، امید ہے الیکشن کمیشن حلقہ بندیوں کا عمل مناسب وقت میں مکمل کر لے گا۔
نگراں وزیر اعظم انوار الحق کاکڑ کا کہنا تھا کہ افغانستان میں امریکا اور اتحادیوں کا چھوڑا گیا جدید اسلحہ بڑا چیلنج ہے،امریکی اتحادیوں کا چھوڑا گیا اسلحہ عسکریت پسندوں کے ہاتھ لگ چکا ہے، عالمی برادری کو ہمیں ایک ذمہ دار ملک کی حیثیت سے دیکھنا چاہیے، اپنی آبادی کے تحفظ کیلئے تمام مناسب اقدامات کررہے ہیں، ہماری مغربی سرحد سے ملک کے اندر حملے ہورہے ہیں۔
