خصوصی عدالت کے جج ابو الحسنات ذوالقرنین نے چیئرمین پی ٹی آئی عمران خان کے خلاف سائفر کیس کی سماعت اٹک جیل میں کی، سیکیورٹی خدشات کے پیش نظر چیئرمین پی ٹی آئی عمران خان کا ٹرائل اٹک جیل میں کرنے کا فیصلہ کیا گیا۔
عمران خان کا ٹرائل اٹک جیل میں کرنے سے متعلق وزارت قانون کی جانب سے باقاعدہ نوٹیفکیشن جاری کیا گیا، جس کے مطابق چیئرمین پی ٹی آئی کی لیگل ٹیم کے 9 وکلاء کو اٹک جیل جانے کی اجازت دی گئی۔
واضح رہے سائفر کیس کی تحقیقات کرنے والی ایف آئی اے ٹیم بھی اٹک جیل میں موجود تھی۔
اٹک جیل کے باہر پاکستان تحریک انصاف کی لیگل ٹیم کے سلمان صفدر نے میڈیا سے گفتگو کرتے ہوئے کہاکہ تمام درخواستیں زیر التوا ہیں سب سے اہم درخواست ضمانت کی ہے، لیکن پراسیکیوشن ضمانت کی درخواست پر عدالت کی معاونت نہیں کر رہی ہے۔
دوسری جانب شاہ محمود قریشی کے جوڈیشل ریمانڈ میں بھی 26 ستمبر تک توسیع کر دی گئی، آفیشل سیکرٹ ایکٹ خصوصی عدالت کے جج ابو الحسنات محمد ذوالقرنین نے ہی اس کیس میں بھی سماعت کی جس کے بعد جوڈیشل ریمانڈ میں توسیع کر دی گئی۔
پاکستان تحریک انصاف کے وائس چیئرمین شاہ محمود قریشی کو سائفر کیس میں ہتھکڑی لگا کر عدالت پہنچایا گیا۔ شاہ محمود قریشی کو آفیشل سیکرٹ ایکٹ کی خصوصی عدالت میں پیش کیا گیا۔
شاہ محمود قریشی نے میڈیا سے گفتگو کرتے ہوئے کہاکہ میں بے قصور ہوں اور سیاسی قیدی ہوں، اللہ مجھے صبر سے جبر برداشت کرنے کی ہمت دے۔
یہ بھی پڑھیں: ملک سے غداری کی ہے تو پھانسی پر لٹکا دیا جائے: شاہ محمود قریشی
شاہ محمود قریشی نے کہاکہ جج صاحب سے گزارش ہے انصاف میں دیر ہوسکتی ہے اندھیر نہیں ہونی چاہیے، پی ٹی آئی کے چیئرمین عمران خان تھے اور ہیں اس میں کوئی ابہام نہیں ہے۔
